Saturday 7 April 2012

Less sense...More fun and madness!!!

Namaskar. Cinema Review mein main Bhawana Somaaya aapka swagat karti hoon.


Iss hafte sirf ek release hain - Sajid Nadiadwala produced aur Sajid Khan directed - Housefull 2.


Do saal pehle - issi banner ne Akshay Kumar aur Deepika Padukone ko lekar Housefull banayi thi - jo boxoffice par na kaamyaab rahi.

Aisa bahut kum hota hai ki koi film-maker apni naa kaamyaab film ka sequel banaye.

Sajid Nadiadwala aur Sajid Khan ne ye jurrat ki hain.

Itna hi nahi - director Sajid Khan ne release ke pehle hi ye elaan kiya hain ke unki film box office par superhit rahegi.

Film jab shuru hoti hain toh aapke mann mein Silsila ka gaana chalta hain - 'Yeh kaha aa gaye hum...'.

Aisa lagta hain jaise hum stupid characters - stupid situations aur stupid jokes ke beech phas gaye hain.



Magar dheere dheere jaise film aage badti hain - director hume apne pagalpan mein shaamil kar lete hain.

Naa chahate hue hum unke brand ke manoranjan mein shaamil ho jaate hain.

Chaar heroes - chaar heroines - paanch baap - aur ek bechaara London ka sheher!!

Akshay aur John college mein dost the - ab dushmann hain.

Riteish aur Shreyas college mein dost the - ab jigree dost hain.

Jacqeline aur Asin behene hain aur dushmann bhi.

Rishi aur Randhir Kapoor sautele bhai hain aur jaani dushmann bhi.

Boman Irani aur Mithoon Chakravorty langotia yaar the aur ab jaani dushmann hain.

Saare kirdaar ache hain aur bure bhi...Sacche hain aur jhoothe bhi...

Kahaani yeh baara-tera characters ke beech ghoomti rehti hain.

Sab kuch over the top - aur loud hain.

Film ka music melodious hain - khaas taur pe Anarkali aur Right Now Now gaane.

Saare performances convincing hain. Khaas taurpe Mithun Chakravorty, Riteish Deshmukh aur sabse behtareen Akshay Kumar.

Film mein beshumaar humour hain par saath mein offensive dialogues bhi hain.

Director Sajid Khan middle aged actors ko sirf rishte ke bajaye - ek nayi pehchaan dete hain.

Kuch filmein dil se dekhi jaati hain.
Kuch deemaag se.
Aur kuch aisi hoti hain jisme na dil ki zarurat hoti hain aur na deemaag ki.
Housefull 2 aisi film hain - jise dekhne ke liye - aap apna dil deemag ghar chodkar anand le sakhte hain.

Agar bachche saath mein hain...toh double meaning dialogues ke waqt unke kaan bandh kar lo.
Agar biwi saath mein hain...toh offensive gestures ke waqt unki aakhen bandh kar lo.
Aur agar mera review pasandh nahi...toh main apna mooh bandh kar leti hoon.

Housefull 2 ko milte hain 2.5 stars.

Agle hafte phir mulaakaat hogi. Tab tak ke liye mujhe dijiye ijaazat. Namaskar.

http://www.youtube.com/watch?v=YJh3bRAwkB8&feature=youtu.be


The review appears as it is on Cinema Review on Zee Cinema, Fridays 9PM.
In an edited version over weekends on 92.7 Big FM

No comments:

Post a Comment