Cutting Chai with Bhawana Somaaya - Day 420

Rani triumphs as Mardaani

22/8/2014

Aditya Chopra produced aur Pradeep Sarkar directed Mardaani ek sahsi aur nirbhay crime branch officer 

Shivani Shivaji Roy yaane Rani Mukerjee ki kahani hain.

Shivani Shehar ki chotti galliyon aur nukkad se jurm ki jaan kari paati hai - criminals ko lapet mein leti hai aur aitiyaad se bade kaatilon ke liye jaal bichati hai!

Shivani manti hai ki chuhe ko pakadne ke liye chuha, sher ko pakad ne ke liye sher aur kutte ko pakadne ke liye kutta banna zaroori hai.

Ek din, ek 12 saal ki phool bechne wali ladki, anathalay se achanak gayab ho jaati hai aur yaha se shuru hoti hai Shivani Roy ki nayi chunauti.

Film ka plus film ka subject, film ka message, film ki writing aur sab se badhiya film ka treatment hai.

Film hard hitting, serious aur bagair entertainment ke bawajood, interval ke pehle aur interval ke baad engaging hai!

Writer Gopi Puthran apne research aur characterizations se crime world aur police officers ko realistically pesh karte hai.

Director Pradeep Sarkar ghrina aur gusse ko dhairya aur mano bol se maat dete hai.

Mafia ki bhumika mein naya ladka Tahir Bhasin villain ki paribhasha badalta hai hai aur officer ki bhumika mein Rani Mukherjee saare stereotypes todti hai.

Shivani Shivaji Roy kad mein chotti  iradon mein badi! Wo shaitan ki tarha sochti hai…athlete ki tarha daud ti hai…aur gundo ki tarha maarti hai…!

Mardaani sirf director Pradeep Sarkar aur heroine Rani Mukerjee ke liye image breaking nahi, Yash Raj Banner ki dashakon ki Parampara ka naya panna paltati hai.

Mardaani Yash Raj Films ki pehli songless, pehli A certified aur pehli female action film hai jisme na koi item number, na dream sequence, na chiffon sari aur na hi naach gaana hain!

Bachpan mein humne padha tha ‘Khoob ladi mardaani who toh Jhaasi waali rani thi’.

Iss purani kahani ko saal 2014 kuch iss tarha se yaad rakhega ‘Khoop ladi Rani Mukherjee wo toh YRF ki Mardaani thi’

Mardaani ko Rani Mukherjee ke power packed performance aur Pradeep Sarkar ke contemproraized crime world ke liye Big Entertainment Ratings milte hai 4 stars.

Bhawana Somaaya/ Tweets @bhawanasomaaya