Cutting Chai with Bhawana Somaaya - Day 344

Chasing a dream

9.5.14

Deepa Bhatia produced, Amol Gupte likhi/ directed Hawa Hawai Mumbai ke street children ki kahani hain.

Ye Amol Gupte ki bachon ke vishay par teesri kadi hain…

Pehli, 2007 mein likhi Taare Zameen Par jo Dyslexia ke baare mein thi.

Doosri, 2011 mein directed Stanley Ka Dabba jo bachon ke lunch box ke baare mein thi.

Aur ab 2014 mein Hawa Hawai, jo bachon ke sapne ke baare mein hain.

Pita ke guzar jaane par Arjun Harishchandra Waghmare aur uska pariwar gaon chodkar, shehar ki tang galiyon mein bass jaate hain.

Arjun subah se shaam sab ko chai pilata hain aur raat dhale, badi gaadiyon se utarkar jab amir  bache Lucky sir se skating seekhte hain, tab issi jhilmilati roshni talle, Arjun bhi ek sapna dekhta hain…

Arjun ka sapna purra karte hain uske chaar dost Ashfaque/ Salman/Maaman aur Tirupati.

Film ka har perrformance, Neha Joshi, Anuj Sachdeva, Saleem Saqib, hero Partho aur uske chaaron dost extraordinary hain.

Jiss tarha se ek nipun skater haule se, apna balance jamata hain, director Amole Gupte apni creative/ technical team ko saath lekar iss sapne ko sache cheron se sajakar, rishton ki jhalar mein bandhte hain.

Hawa Hawai se behtar iss summer vacation mein bachon aur bachon ke maa baap ke liye behtar tohfa nahi ho sakta!

Film ke poster pe likha hain- ‘Kuch sapne sone nahi dete’…Main kahungi ‘Kuch filmein sone nahi deti…’

Hawa Hawai bhi dher saara pyaar ke saath Big Entertainment Ratings milte hain 4 stars.

True story

Sumeet aur Neelam produced/ Sandeep Varma directed Manjunath Lucknow ki oil company se jude ek brilliant IIM graduate ki kahani hain.

Jab Manjunath ko pata chalta hain ki petrol ko kerosene mein milakar ghotala kiya ja raha hain, wo Uttar Pradesh ke saare petrol pumps bandh karane lagta hain!

Satya ghatna par adharit Manjunath wo sainkdo IIM graduates ki kahani hain jo bahtar zindagi ki chaah mein apne ussulon se samjhauta kar lete hain.

Film ki neeyat nek hain aur prayog imaandar, film ka treatment subject ke liye anokha hain aur message serious!

Film ka minus overstretched plot jiski wajah se film burri tarha se bikhar jati hain.

Manjunath ko aaj ki yuva peedhi ko prerit karne ke liye Big Entertainment Ratings milte hain 2 stars.

Bhawana Somaaya/ Tweets @bhawanasomaaya