Cutting Chai with Bhawana Somaaya - Day 176

Madras Café is a must visit

23.8.13, Mumbai

John Abraham produced aur Shoojit Sircar directed Madras Café Rajeev Gandhi assassination ki kahani hain.

RAW Covert Operations ke head Major Vikram Singh, yaane John Abraham, Sri Lanka Tiger Group ke head, yaane Anna ke liye aman ka prastav lekar aate hain.

Tab Vikram ko ye nahi pataa ki ye operation uske liye , department ke liye aur desh ke liye ek khatarnak chakravyuh saabit hoga.

Iss film ko dekne ki 5 wajah hain:

1. Film ka bold subject. Rajiv Gandhi ke assassination ko 22 saal ho gaye hain magar ab tak iss vishay par koi film nahi bani hai, ye pehli film hain.

2. Film ki writing. Teen writers Shubhendu, Juhi aur Somnath ka combined screenplay, well researched aur hard hitting hain.

3. Film ki refreshing casting. Lead actors John Abraham aur Nargis Fakhri ke siwaye zyadatar supporting roles mein non actors liye gaye hai jiski wajah se film aur bhi special ban jaati hain.

4. Film ki cinematography Sri Lanka ke atyachar , Cochin ki scenic beauty ya phir Delhi office ke mundane meetings... camera sab kuch capture karta hai.

5. Aur aakhir mein film ki treatment. Director Shoojit Sircar kahani ko vishay ke anusar - bagair frill ya fuss – sachai aur imandari se pesh karte hain.

Film lambi hai aur bagair any relief ya entertainment! Kuch sequences sharper edit ho sakte thhe aur kuch scene mein music ki kammi bhi mehsoos hoti hain...

Madras Café ek docu drama ki tarah strong and realistic hain jisse har Hindustani,  khaas taurpe jo post 91 generation ke hain, unhe dekhni chahiye.

Kuch filmein achhi ya burri hoti hain - aur kuch sahi ya galat. Madras Café message aur intention mein sahi film hain!!

Madras Café ko Big Entertainment Ratings milte hain 3.5 stars. 

Bhawana Somaaya / @ bhawanasomaaya