Cutting Chai with Bhawana Somaaya - Day 333

Rani impresses, Samrat disappoints, Kaanchi surprises

25.04.14

Subhash Ghai likhi- produced aur directed Kaanchi ko hum ek inspirational kahani keh sakte hain... 

Isse hum Uttrakhand ki khupsurat vadiyon mein bassi ek joshili prem kahani bhi keh sakte hain…

Ya phir aaj ke Hindustan ke jagrit naujawan ki system ke khilaaf ladai …

Film ka plus Mandira Shukla ke costumes,corrupt cop ke role mein Chandan Roy Sanyal, Irshaad Kamil ke lyrics aur Ismail Darbar ka sangit, khaas taurpe ‘Tu sab kuch hai’

Film ka minus film ki length aur naujawan kahani mein misfit lagte veteran actors Mithun Chakraborty aur Rishi Kapoor.

4 dashak 19 filmein aur kaii naye kalakaron ko break dene ke baad, Subhash Ghai ek aur naye jode ko  pesh karte hain.

Pyaar ka Punchnama ka Kartik Aryan jo Hindi filmon ke liye bane hain aur Mishti jo film ki jaan hain aur chotti Rani Mukherjee ki yaad dilate hain.

Kaanchi ko nek soch , sachi neeyat aur nayi peedhi ke liye sandesh ke liye Big Entertainment Ratings milte hain 2.5 stars.

                                                                        *

Tigmanshu Dhulia produced aur Sai Kabir likhi-directed Revolver Rani Madhya Pradesh ki rajneeti ki kahani hain, iske bawajood unn saari filmon se alag hain jo humne ab tak dekhi hain.

Wo isliye kyon ki Revolver Rani political satire hain jisme thodi hassi, thodi masti, aur bohat zyada khoon kharaba hain.

Ismein Chambal ki goliyaan hain…Gwalior ki gunda-gardi… Bollywood ke naach gane…Italy ke costumes aur Madhya Pradesh ki vishesh Hindi aur Angrezi.

Director manoranjan ke saath saath, aam zindagi ki samasyaein, jaise rang-roop/ aurat-mard/ pariwar-samaaj/ paisa-pyaar par vyang karte hain.

Beshaq ye sab ke temperament ki film nahi hain magar anokhi hain, film ke titles se lekar, aakhri scene tak rassili aur nirali hain!

Film ka minus film ki length aur excessive violence, film ka plus film ki likhawat, humour aur dher saare dilchasp kirdaar.

Film ka sabse bada plus, Kangana Ranaut jo Alka Singh ka chehra/ chaal-dhaal/ zabaan- galiyaan/ dil-jasbaad ko aise apnati hain jaise khud Chmbal mein palli badi ho.

Hindi Cinema ki 1940 ke dashakki Fearless Nadia ki tarah 2014 ki Revolver Rani ek baar phir Indian Cinema ki heroine ka ithihaas badalti hai

Revolver Rani ko Big Entertainment Ratings milte hai 3 stars.

*

Kavita Barjatya produced aur Kaushik Ghatak directed Samrat & Co, ek private investigator, Samrat Tilak Dhari yaane Rajeev Khandelwal ki kahani hain.

Ek ajnabi ladki, Samrat ke ghar apne pita ke qatil ko dhoondh ne ke liye Samrat se madad maangne aati hain aur Samrat apne  assistant Chakradhari ke saath case solve kar deta hain.

Film ka plot ordinary hain aur mysery bohat zyada simplistic. Outdoor locations khupsurat hain aur kuch dialogues witty.

Behtar hoga agar aap ghar baithkar TV par CID dekhe ya phir Rajeev Khandelwal ki koi purani film dekhe. 

Samrat & Co ko Big Entertainment Ratings milte hain 1.5 stars.

Bhawana Somaaya/ Tweets @bhawanasomaaya