7 releases. All far from rainbow.

Namaskar - Cinema Review mein - main Bhawana Somaaya - aapka swagat karti hoon.

Peechle do mahino mein- IPL ki wajah se - zyaada badi filmein release nahi hui hain.

Chotti filmein - jo badi filmon ke saath release hokar aksar box-office par maar khati aayi hain -

Aise samay ka - fayda uthati hain.

Aanewale ravivar ko IPL khatam ho jayega - aur saath hi mein - chotti filmon ka carvaan bhi.

Indradhanush mein saat rang hain - aur iss shukrawar - saat filmein- cinema halls mein apna rang dikhayegi.

Shuruat karte hain Love Recipe se:

Film ke ek scene mein hero ke pita apne bete se kehte hain 'Pyaar wo hain - jo dheemi aanch par pakta hain aur dheemi aanch par hi tikta hain…'

Director apne character ki baat seriously le lete hain -

Film dheemi aanch par chalti hain aur climax tak pakti nahi…

Aur ek baat - title ka kahani se koi matlab nahi -

Film ka title Love Recipe nahi - Confusion Recipe hona chahiye tha.

Love Recipe ko milta hain 1 star.

Rakt Beej ek aur maara-maari aur khoon kharabe ki kahani hain.

Film mein itne saare tracks aur characters hain - ke kiska - kisse

- kya rishta hain -kissiko samajh mein nahi aata.

Ye bhi samajh mein nahi aata - ki hero - dacait aur business man ka double role nibha raha hain...

Baap bete ki itni simple kahani ko itna complicated banane ke liye-

Rakt Beej ko milta hain 1 star.

Ye Khulla Aasmaan sabit karta hain ke zaroori nahi - ke ek acha khayal ek achi film mein badle.

Ye aise teen generation ki kahani hain - jo gaon-shehar aur pardes mein faile hue hain.

Film ka sangit acha hain - aur sandesh nek -

Writer zindagi ko aasmaan mein udti patang se tulna karte hain.

Afsos  - ke wo hamare dil ko - patang ki tarha - aasman mein nahi uda paate!

Ye Khulla Aaasmaan ko milta hain 1.5 star.

MLA Madhya Pradesh ke chotte gaon Bhagalpur ki kahani hain...

Ek sacha insaan - gaon walon ka vishwas jeet ta hain -

Aur doosri aur ek dhoke baaz- apne  kapat se - wohi vishwas ko todta hain !

Kahani jaani pehchani hain -

Film ko dilchasp banati hain - authentic locations - bhasha aur saare performances -

Khas taurpe Mukesh Tiwari.

MLA ko sahi Madhya Pradesh se humara samparrk karwane ke liye milte hain 2 stars.

Chutki Baja Ke - ko bachon ki kahani kaha ja sakta hai... -

Super natural kahani kaha ja sakta hai... -

Ya phir inspirational film kaha ja sakta hai...

Ek bohat purani kahawat hain - zulm karne wale se zulm sehne wala zyada kusurwaar hota hain!

Dhaabe mein kaam karne wala anaath Chottu - kayi zulm sehne ke baad -

Guru Baba Khan ki madad se apne par hue - har atyaachar ka datt ke jawab deta hain.

Iss refreshing aur positive message ke liye Chutki Baja Ke ko milte hain 2.5 stars.

Love Wrinkle Free - Goa mein basein aaj ke urban nuclear family ki kahani hain.

Aise subjects hum ab tak- Hollywood filmon mein dekhte the-

Magar ab aisi filmein- hum khud bana rahe hain.

Title se ye bohat boring film lagti hain -

Magar theatre mein jaane ke baad - full on entertainment guaranted hain.

Film ko special banati hain - film ki middle aged lead pair - Ash Chandler aur Shernaz Patel.

Aur saath mein Goa ki masti - Ye film sirf aur sirf Goa mein banayi jaa sakti thi.

Love Wrinkle Free ko milte hain 3.5 stars.

Aur aakhir mein UTV ki ambitious animation film

Arjun- The Warrior Prince.

Purane zamane mein - jab Shah Jahan ne Taj Mahal banaya tha- usmein sainkdo karigaron ki mehnat shamil thi.

Aaaj ki Arjun jaisi animation film ke peeche bhi - sainkdo talented artistes shamil hain.

Anginat animators jisne

mahine saal - raat din - computers ke aage baithkar graphics banaye hain…

Har frame - har character ko - alag soch aur alag roop diya hain…

Main salaam karti hoon Murlidhar aur Rastogi ke production design ko -

Jisne Mahabharat ke Hastinapur  - Indraprasth aur jungalo mein bitaye - Paandavo ke agyavast  ko bekhubi se pesh kiya hain…

Director Arnab Chhaudhri ne  animation films aur iss desh ka gaurav badhaya hain.

Arjun The Warrior Prince ko cinema ke itihaas - ka naya panna paltane ke liye - milte hain 4.5 stars.

Toh ye thi iss hafte ki releases- agle hafte phir mulaqat hogi - tab tak ke liye mujhe dijiye ijaazat -Namaskar.

Bheem rocks but Department shocks!!!

 Namaskar - Cinema Review mein - main Bhawana Somaaya - aapka swagat karti hoon.

Summer vacations abhi tak jaari hain - aur baarish ko bas kuch hafton ki der hain.

Shayad isiliye producers itni raftaar se filmein release kar rahe hain.

Iss hafte 6 releases hain - aur saare alag mijaaz ke -

ab aap par hain - aap kaunsi film par apna paisa kharch karna chahte ho.

Pehli - Chotta Bheem -Animation film hain -

Agar aapko special effects mein ruchi hain - to Chhota Bheem aap ke liye hain warna nahi.

Chhota Bheem ko milte hain 2 stars.

-----------------------------------------------------------------------------------

Doosri - Apradhi Kaun - Thriller / Horror film hain -

jo ek saath do bhashao mein release ho rahi hain.

English version film ka title hain -Don't Be Afraid Of The Dark. Meri salah hain - dono se darr

ke rahiyye.

Apradhi Kaun ko milta hain 1 star.

 -----------------------------------------------------------------------------------

Teesri - Marigold Hotel - International film hain - jo Slum Dog Millionnaire bana ne

waale Studio ki peshgi hain.

Marigold Hotel - Dev Patel - Lilette Dubey ko milte hain 3 stars.

 -----------------------------------------------------------------------------------

Chauthi - Love Lies & Seeta - Diaspora film hain.

NRI writer likhit aur directed ye aise 6 doston ki kahani hain-

jo saath rehte hue faisla nahi kar paate unhe kisse pyaar hain.

Bohat saal pehle aisi hi NRI ne ek film banayi thi -ABCD - jiska matlab tha America Born Confused Desi.

Seeta aur uske chahne wale America born super confused desi hain!

Love Lies & Seeta ko milta hain ½ star.

 -----------------------------------------------------------------------------------

Paanchvi - Mr Bhatti on Chutti - ek sadharan aadmi ke sadharan sapno ki kahani hain.

Aise characters aur kahaniyaan aam taurpe darshakon ke mann jeet lete hain.

Magar writer-director Karan Razdan purri film mein - hume ek bhi aisa scene nahi dete

jisse hamara manoranjan ho.

Sawal ye hain - ki ache actors ko badi filmon main chotte roles karne chahiye - ya phir chotti filmon mein bade roles?

Jawab ye hain -ki sab ko sirf ache directors ke saath kaam karna chahiye!

Isliye behtar hota agar

Bhatti chutti par hi rehte!

Mr Bhatti on Chutti ko milte hain ½ star.

 -----------------------------------------------------------------------------------

Chathi - Ram Gopal Varma ki ek aur police- politician-underworld nexus film- Department.

Yakeen nahi hota ki ye film Rangeela, Satya aur Sarkar bana ne wale director ki peshgi hain.

Ye wahi Ram Gopal Varma hain jisne hume Rakht-charitra, Aag aur ab Department laaye hain.

Pehli baar multi cameras se shoot ki gayi Department Bharat ki ek aitihasik film ban sakti thi.

Iske bajai - multi cameras pagal parindo ki tarha - yahan wahan ghumte rehte hain - aur film ko mazak banakar rakh diya hain!

Ek serious scene ke beech -

bina wajah - irrelevant images ko extreme close shoot kiya gaya hain-

jiski wajah se kabhi Sanjay Dutt ke nakhoon… hero ke joote…

kabhi Amitabh ke haath…

kabhi villain ki chai…

aur item girl ki taangein aur hhoth aapko aake sarpar marti hain.

Mat puchiye ke kaun police hain aur kaun goonda - ya kaun sacha hain aur kaun beimaan-

kyon ki kuch bhi maynne nahi rakhta.

Do ghante aur bees minute ki film mein kariban 1000 bullets - 500 galiyaan - 250 chakku ke waar -100 mukke aur 50 laaton ke baad jab koi hathyaar ya gaali aap par atyachaar karne ke liye nahi bachti -tab jaa ke film khatam hoti hain.

Koi normal insaan apne hosho hawas mein - aisi film nahi dekh sakta.

Ab director Ramgopal Varma se disappoint ya khaffa hone ka samay khatam ho chuka hain.

Aisi behuda film bana ne ke liye

I'll sue Ram Gopal Varma for mental cruelty !

Department ko milte hai 0 star

 -----------------------------------------------------------------------------------

To ye thi iss hafte ki releases - agle hafte phir mulaqat hogi-

tab tak ke liye mujhe dijiye ijaazat -Namaskaar.

The review appears as it is on Cinema Review on Zee Cinema, Fridays 9PM.

In an edited version over weekends on 92.7 Big FM

A week of Ishq

Namaskar – Cinema Review mein - main Bhawana Somaaya aapka swagat karti hoon

Ye saal ka wo samay hain - jab schools mein chhuttiyaan hoti hain - aur theatres mein

releases ki baarish lagti hain -

Iss hafte - ek baar phir - teen releases hain:

Alipur Films ki The Forest…Reliance Entertainment ki Dangerous Ishq…Aur YRF Films ki

Ishaqzaade…

****

Pehle baat karte hain The Forest ki –

Ye ek aise jungle ki kahani hain - jahan pehle - insaan apne shaukh ke liye - Cheeteh ka shikaar karta hain.

Jab zakhmi Cheetah - apna shikaar karne ke kaabil nahi rehta - tab wo jungle ke bajai - insaan ki basti mein - shikaar dhundhta hain.

Aisa mana jaata hain - ki agar Cheetah ek baar - insaan ka khoon chakh le - toh wo koi doosra

khorakh nahi khaata.

Itna hi nahi - Cheetah insaan ki tarha sochta hain - wo soch samajhkar - samay dekhkar - dushman par vaar karta hain!!

The Forest extraordinarily photographed film hain - kaash film ki kahani bhi itni hi convincing hoti...

Writer director Ashwin Kumar apne characters ke aapsi rishton mein - iss tarha se kho jaate

hain - ki Poaching jaise serious issue ko address nahi kar paate.

Cheeteh ke baad - Javed Jafri ka sabse best performance hain.

Jokes aside - Javed Hindi cinema ke aise honhar kalakar hain - jisse abhi tak - apni qabiliyaat ke layak role nahi mila.

The Forest ko wild life dikhane ke liye milte hain 2 stars.

****

Ab baat karte hain- Dangerous Ishq ki:

Super model Sanjana ko - ek saal ke liye Paris bheja jaa raha hain.

Airport jaate samay - Sanjana apna irada badalkar - apne boyfriend Rohan ke paas wapas aati

hain.

Agli subah - jab Rohan aur Sanjana - apni shaadi ke plans bana rahe hain - kuch goonde  aakar

Rohan ko kidnap kar lete hain!

Ghayal Sanjana jab aspatal mein aankhein kholti hain - usse ajeeb anubhav hone lagte hain…

Ab wo Urdu padh sakti hain - jo usne kabhi na seekhi hain - na boli hain…

Doctor ki salah se - aur hypnotist ki madad se - Sanjana ko uske peechle janam mein regress

kiya jaata hain.

Ye aise do premiyon ki kahani hain - jo yugon yugon se -ek doosre se bichadte aaye hain.!!

Har janam aur har roop mein - unhe gehri saazish ka samna karna padta hain.

Dangerous Ishq abtak ki sabhi reincarnation - yaane punnar janam par adharit filmon se hatkar hain.

Writer Amin Hajee hume jerky flashbacks ke bajai - halke dissolves mein - 1535 ke Chittorgarh se - 1947 ke Laudi Kottal ka safar karwate hain...

Unki ye rangeen kalpana ko aur bhi anokha banate hain - director Vikram Bhatt.

Bhatt ne hume kuch samay pehle - India ki pehli Stereoscopic 3D film Haunted di thi.

Iss baar  - Vikram Bhatt India ki pehli 3D thriller laaye hain .

Ab sawal ye hain ki - kya Dangerous Ishq - Karisma Kapoor ke liye sahi comeback choice hain?

Jawab hain haan - kyon ki ek hi film mein - Karisma ko alag alag kirdaar nibhane ka mauka mila hain.

Designer Manish Malhotra aur cameraman Praveen Bhatt - puri lagan se Karisma ko har yug

mein sajate hain…

Magar pata nahi kyon Karisma apne aap ko puri tarha se camara ko sabmit nahi kar paati...

Koi jhijhak hain....

Dangeorus Ishq ko purane concept ko naye andaaz mein pesh karne ke liye milte hain 3 stars.

****

Aur aakhir mein YRF Films ki Ishaqzaade:

Posterse se Ishaqzaade ek yaadgar love story lagti hain.

Magar asal mein Ishaqzaade love story se bahot zyada hain...

Ise chote sheher ki chotti soch ki kahani bataya ja sakhta hain…

Ise bade pariwaaro ki bade akankshaon ki kahani bhi bataya jaa sakhta hain…

Isse mazhabon ki ladai bhi kaha jaa sakta hain...

Rajneeti ki shey aur maat...

Aur Parma - Zoya ki violent love story.

Parma jo aaye din danga fasaad karta hai- Aur apne MLA dada ke elections mein aawaz uhata hain.

Zoya jo jhumke bech ke bandook khareedti hain aur MLA banne ka sapne dekhti hain.

Writer Director Habib Faisal jisne hume iske pehle Do Dooni Chaar aur Band Baaja Baraat

jaisi filmein di hain-

Iss baar ek aur kahani mein twist laaye hain!

Parma-Zoya ki love story mein aisa kuch nahi hota - ya tab nahi hota - jo hum sochte hain.

Interval ke pehle ka romantic track - aur interval ke baad- unke pariwaaro ka conflict track - bahut lamba aur boring hain.

Iske bawajood - Ishaqzaade naya sangeet - nayi bhasha - naye chehre - nayi jagah ko introduce karti hain.

Rifle uthake nishana lagane wali Zoya ki bhumika mein Parineeti Chopra mirchi se zyada teekhi hain.

Magar aakhir mein the film belongs to debutant Arjun Kapoor...

Jo 2000 ke hero ko nayi identity dete hain.

Kapoor apne chacha Anil Kapoor ki tarha supremely confident aur uninhibited hain.

Ishaqzaade ko milte hain 3.5 stars - jisme se 2 stars Arjun Kapoor aur Parineeti Chopra ke

chemistry ke liye hain.

Toh ye thi iss hafte ki releases - agle hafte phir mulaqat hogi - tab tak ke liye mujhe dijiye ijaazat.

Namaskar

The review appears as it is on Cinema Review on Zee Cinema, Fridays 9PM.

In an edited version over weekends on 92.7 Big FM

Fatso - an imagination & Jannat 2 - violent

Namaskar - Cinema Review mein - main Bhawana Somaaya - aapka swagat karti hoon.

Aaj Buddhh Purnima hain. Iss din Siddharth Gautam ko nirvana mila tha.

Ittefaq se iss hafte ki dono filmein - kuch khone talashne - aur moh maaya ke bandhanon ke baare mein hain.

Pehle baat karte hain Rangita Nandy produced aur Rajat Kapoor directed Fatso ki.

Tannu -Yash - Naveen - Nandini aur motta Suddip ache dost hain.

Ek din - Naveen - car accident mein achanak maara jaata hain!

Ab Naveen - ek doosri duniya mein aankhein kholta hai!!

Yahan usse pata chalta hain ki marna usse nahi - uske dost Sudeep ko tha - aur usse galti se upar laya gaya hai.

Ab samasya ko suljhane ke liye - Naveen -yaane Purab Kohli ko - motte Sudeep - yaane Ranvir

Shorey ke shareer mein pravesh kiya jaata hain...

Kahani bohat mazedar hain - aur uss se bhi dilchasp hain director ki vichardhara.

Writers Saurabh Shukla aur Rajat Kapoor jeevan - mrityu ko ek hasmukh paribhasha dete hain.

Unki kalpanik duniya mein na swarg hain - na narag - na devta hain -na daanav!

Haan k-a-a-l nischitt hai - isliye accident nimmit samay par hota hai!!

 Yaatri ko le jaane ke liye yamraj bhi haazir hai - do singh lagaye - zor se hasne wala yamraj nahi - ek sadharan rahgir...

Sab ko patta hain ki aatma akele safar karti hai - aur humne usse abtak tv serial aur kitabon mein -badalon mein safar karte dekha hai...

Rajat Kapoor Naveen ki aatma ko summsaan rail gaadi se aakhri station pohchate hain.

Rajendra Kumar ki purani film Jhuk Gaya Aasmaan mein bhi aisa kuch hua tha…

Rajat Kapoor ki khasiyat ye hai ki wo plot se zyaada kalapana aur ehsaas ko ahmiyat dete hain.

Film ki writing- treatment-locations- situations-costumes effortlessly natural hai

Aur Gul Panag - Purab Kohli real life couple lagte hain...

Film ki kuch imageries aur baatein aap ki soch ke bahar hain: Jaise swarag narag ke beech ka waiting room aur wahan ka vatavaran…

Kuch dialogues kamaal ke hain…jaise samay ya insaan jab guzar jaata hain - to kahi to jaata hoga…?

Kuch pal yaadgaar hain - jaise Ranvir Shorey ka breathless monologue jo bahtareen likha aur

perform kiya gaya hai…

PNC banner ne hamesha revolutionary filmein banayi hain - Fatso ussi disha mein ek aur prayaas hai...

Sirf ek problem hai - title aur posters humme mislead karte hain - Ranvir utna motta nahi hain - jitna film mein zikkar hota hain.

Fatso ko hume ek imaginary duniya mein le jaane ke liye milte hain 3 stars.

**************************************************************

Ab baat karte hain Jannat 2 ki...

Fox Star aur Vishesh Films produced Jannat 2 ek aur cop crime nexus ki kahani hai.

ACP Pratap - yaane Randip Hooda - hathyaar ke dhandhey ko khatam kar dena chahte hai.

ACP ki madad karta hai - ek chotta chor - Sonu Dilli yaane Emram Hashmi - jo purane hathyaaron ko - chamka kar – dugne daam mein bechta hai.

Har mafia film mein chor-police ki tolliyaan hoti hain - ismein bhi hain...

Ek vaihshat failane wala villain hota hai - jaise Manish Chaudhary…

Ek ice candy haseena - jaise Esha Gupta.

Vishesh Films aam taurpe apni kahani aur music ke badde pakke rehte hain.

Iss baar bhi Pritam Chakrabati ke music mein kashish hain magar Shagufta Rafiq

ki kahani mein koi surprises nahi.

Film ki shuruat mein ek lamba voice over hain - jo unclear hai.

Emram Hashmi aur uska dost - purani Dilli ki thet bolli bolte hain - jo samajh mein nahi aati.

Halake Randeep Hooda aur Emran Hashmi ne acha kaam kiya magar saare scenes itne lambe hain ki aapka mann bhatakta hain.

Bohat saare sawalon ke jawab aakhir tak nahi milte…

Randeep Hooda - har raat - public booth se hi kyon apni patni se  baat karte hain…?

Esha Gupta jaisi honahar doctor Emran jaise awara ko kyon dil degi…

Emram Hashmi ke paas shadi ke baad itna bada bungla kab aur kaise aata hai…?

Jannat 2 beshumar violence aur gaali galoch se bhara hain - isliye yahan sukoon hargiz nahi

mil sakta...

Jannat 2 ko milte hain 2 **stars.

Toh ye thi iss hafte ki releases - agle hafte phir mulaqat hogi - tab tak ke liye mujhe dijiye ijaazat Namaskar.

 

The review appears as it is on Cinema Review on Zee Cinema, Fridays 9PM.

In an edited version over weekends on 92.7 Big FM