Cutting Chai with Bhawana Somaaya - Day 298

Women Empowerment

07.03.14

Iss saal Women’s International Day ko 2 filmein release ho rahi hain aur dono, naari shaki ke baare mein hain.

Sahara produced Gulab Gang aurat ke saath atyachar ki ladai hain aur Phantom produced Queen swantantra nari ki udan ki kahani hain.

Aur dono mein  jeet aurat ki hoti hain. Happy Women’s International Day.

 

Vikas Bahl likhi-directed Queen Delhi ke Rajjori mein pali badi, halwai ki beti Rani ki kahani hain.

Ussi  illake ka ladka,  Vijay ko Rani se pehli nazar mein pyaar ho jaata hain aur dono families ke aashirwaad se chat mangni aur byah tayy ho jaata hain.

Shaadi ke agle din Vijay Rani ko akele coffeeshop bulata hain,  jiske baad, dono ke ghar mein sannata cha jaata hain.

Mehandi wale haath aur dil mein dard liye, Rani akele, apne honemoon ke liye Paris jaati hain.

Aisi film, ya aisi kahani, humne aaj tak Hindi filmon mein nahi dekhi. Isse milti julti bohat saari filmein dekhi hain magar aisi nahi…

Queen aurat ke samman aur khushiyon ki kahani hain aur aise mushkil samay mein Rani ka saath dete hain  uska pariwar, dost aur uski apni himmat!

Kangana Ranaut iss tarha se Delhi ki Rani aur Paris ki Queen mein kho jaati hain ke kirdaar mein abhinetri ko khojna  mushkil ho jaata hain!

Dialogue credits mein Kangana Ranaut ka naam bhi shamil hain – aur ye unke bahtareen performance ki ek aur wajah hain.

 Queen ko Paris ki galiyaan aur Kangana Ranaut ke spirited presence liye Big Entertainment Ratings milte hain 3.5 stars.

***

Saumik Sen likhi directed Gulab Gang Rampur ke aise gaon ki kahani hain jahan auratein saath milkar atyachar ke khilaaf awaaz uthati hain. 

Gaon wale unhe pyaar se didi pukarte hain aur atyachari unki peeth ke piche unko gang bulate hain.

Haath mein danda aur paun mein payal, shaadi mein nachti, aur maiyat par sogg manati, bhinn-bhinn gulabi rango ki sadiyon mein lipti Gulab Gang mein sainkdo hain, magar awaaz sirf ek -Rajjo ki!

Film ka plus, film ka premise, sets, dialogues, khaas taurpe Saroj Khan ki choreography, Parvez Sheikh ke stunts, Ekka Lakhani ke costume aur Soumik Sen ka music.

Ek gaane mein Madhuri aur unki maa Snehlata Dixit ne bhi ne bhi awaaz di hain.

Film ka minus film ki length, lose editing aur one dimensional story hain jo ek hadh ke baad aap ko ghutta dete hai!

Juhi Chawla apne career ka pehla negative role bakhubi se nibhati hain aur Madhuri Dixit jiss adaa se nachti hain, ussi josh se action scenes bhi karti hain!

Wo atyachari par bijli ki tarha barasti hain aur piddit ko Trishul thaame Ma Durga ki tarha nyay dilati hain!!

Gulab Gang aap ko sochne par majboor karti hain aur aakhir mein jab recent headlines dohrayee jaati hain tab aap ka dil aur aankh, dono bhar aate hain!

Gulab Gang ko Big Entertainment Ratings milte hain 3 stars.

Bhawana Somaaya/ @bhawanasomaaya