Friday 4 July 2014

Cutting Chai with Bhawana Somaaya - Day 383

Lekar Hum Deewana Dil has good pairing no destination.
Bobby Jasoos has great ambience but poor plot.

Saif Ali Khan produced aur Arif Ali directed Lekar Hum Deewana Dil aaj ki peedhi ki ek aur prem kahani hai.

Saal 1997 mein director Yash Chopra ne Dil Toh Pagal Hai mein hume bataya ki dosti pyaar nahi hain aur Shah Rukh Khan – Madhuri Dixit aur humne maan liya.

Uske baad saal 1998 mein director Karan Johar ne Kuch Kuch Hota hai mein hume samjhaya ki pyaar hi dosti hai aur phir se Shah Rukh Khan – Kajol aur humne maan liya.

Ab director Arif Ali hume Karishma yaane Deeksha Seth aur Dino yaane Armaan Jain dwara batate hai ki dosti shaadi hain aur shaadi bhaag ke karni chahiye.

Dono college mein ek saath padhte hain aur apna saara samay ek doosre ke saath guzaar te hain.

South filmon ki heroine Deeksha Seth refreshing hai aur hero Arman Jain camera ke samne itne relaxed hai ki unko dekhkar nahi lagta ki ye unki pehli film hai.

Film ka plus film ki lead pair Armaan-Deeksha aur ARRehman ka naujawan music.

Film ka minus director Arif Ali deewane dilo ko manzil pohchane mein bohat der lagate hain.

Le Kar Hum Deewana Dil ko Big Entertainment Ratings milte hai 2 stars.

******************************************************************************

Dia Mirza-Sahil Sangha produced aur Samar Shaikh directed Bobby Jasoos Bilkeez yaane Vidya Balan  ki kahani hain.

Bilkeez detective banna chahti hain aur kyon ki koi usse naukri nahi deta usse zabardasti apni dukaan kholni padti hai.

Ek din Bilkeez ko bada case milta hai jiske baad dheere dheere Bilkeez ki zindagi badal jaati hain.

Hyderabad ki tang galliyon mein shoot ki gayi iss film ke sabhi characters, unke boli, costumes, rehan sehan, ghar, mohalla realistic aur refreshing hain.

Writer Sanyukta Chawla chotte se chotte kirdar ko izzat aur mohabbat se pesh karti hain phir wo Bilkeez ki khalla Tanvi Azmi ho, Ammi Supriya Pathak, Abba Rajendra Gupta ya lambe arse ke baad bade parde pe dikhe Anees Khan yaane Kiran Kumar.

Problem film mein variety or plot ki hai – na isme koi khaas thrill hai na mystery aur na suspense.
Bobby Jasoos jasoosi ke baare mein kum jasbaddon ke baare mein zyada hain.

Balki isse parivarik kahani, prem kahani ya phir Hyderabad shehar ki kahani batana zyada munasib hoga.

Charminar ke choodi wale…Masjid ki aazaan…Paradise ki Biryani aur teen seater mein paanch burkhe odhe sawarriyaan ghumaane wali autorickshaein.

Bobby Jasoos chotte shehar ke haussle ki kahani hain, betiyon ke sapnon ki kahani hain, parivar ke vishwas ki kahani hain.

Zahir hai inn tedhi medhi galiyon mein director Samar Shaikh se bohat kuch choot gaya hain magar unki neeyat nek hai.

Aur Bilkeez Vidya Balan ki kabiliyat ke liye humare paas sirf ek hi labz hai Subhanallah!


Bobby Jasoos ko Big Entertainment Ratings milte hai 3 stars.

Bhawana Somaaya / Tweets - @BhawanaSomaaya

No comments:

Post a Comment