Friday 11 September 2015

Hero – Disappointing - DAY 654


Salman Khan produced aur Umesh Bist likhi, Hero, saal 1983 Hero ka remake hain. Peechli baar director Subhash Ghai ne Jackie Shroff-Meenaxi Seshadri ko launch kiya tha. 

Iss baar, director Nikhil Advani do aur naye kalakar, Sooraj Pancholi-Athiya Shetty ko launch karte hain. Saal 1983 ki Hero mein shandaar sangit, masti aur manoranjan tha. 

Saal 2015 ki Hero mein, na dil hai, na jaan aur na hi jasbaat! Ritesh Soni ki slow editing, kahani aage hi nahi badhati aur badhati hai tab, ek hi gaane mein 2 saal nikaal deti hai. 

Sawal ye hai ki producer/ director ne iss film ka remake kyu socha?  Aur agar socha, toh isse naye tareke se kyon nahi likha aur pesh kiya? 

30 saal pehle, hero ka heroine ko agvaa karna aur police ka unko na dhoond paana, samajh aata hai! Aaj ke daur mein, unka barfeele pahadon mein khulle aam ghumna aur police ka unko na dhoondh paana, unrealistic hai.

Film ka plus: action aur locations. 

Film ka minus: saare kirdaar aur saare rishte jo khokkhle aur banavti lagte hai. Na IG officer-Pasha ki dushmani convincing hai aur na hi Radha-Sooraj ki do mulakaton ke prem kahani. 


Film mein ek dialogue baar baar dohraya jaata hai: Alt Control Delete!

Kaash director Nikhil Advani ye kar sakte...

Kaash Athiya aur sooraj bhi ye kar sakte...

Film ka sab se khubsurat pal, end credits hai, jahan Salman Khan apni awaaz aur mein gaate hai.
Thoda sharmate hai…thoda muskurate hai aur sach much hero lagte hai…

Hero ko Big Entertainment Ratings milte hai 2 stars.

Bhawana Somaaya/ @bhawanasomaaya

No comments:

Post a Comment