Talvar is thought provoking. Singh is Bling mindless entertaining - Day 669

Vishal Bharadwaj likhi aur Meghana Gulzar directed Talvar saal 2008 ke Noida double murder case ki kahani hai.

 

Issi case par issi saal, ek aur film release hui thi, Manish Sharma ki Rahasya aur jahan Rahasya ne iss ghatna ko ek kalpnik kahani ki tarha pesh kiya, director Meghana Gulzar ki Talvar newspaper headlines aur TV par hue vivaad ko dohrati hai.

Film ka plus film ka detailed research aur engaging screenplay. 

Talvar police, kanoon, media, CBI sab ko lekar sawal uthati hai.  

Director Meghana Gulzar chotte se chotte scene aur kirdaar ko ahmiyat deti hai aur sab se badi baat, audience ko underestimate nahi karti.

Filhaal, Just Married aur Dus Kahaiyaan ke baad, Talvar Meghana ki sabse mushkil aur mature film hai!

Hero Irfaan Khan film ki jaan hai aur jab wo screen par hai aap kissi aur par nazar nahi daal sakte ho.

Special appearance mein Tabu, haule se kahani mein shamil hoti hai aur Chupke se aapka dil chura leti hai.

Lyricist Gulzar ka sirf ek gaana hai magar aap ko jhanjhod ne ke liye kaafi hai.

Talvar dekhni chahiye, ye samajh ne ke liye, ke jab tak, humara zameer nahi jaagegae, tab tak, kuch bhi nahi badlega!

Sensitive, thought provoking, hard hitting Talvar ko Big Entertainment Ratings milte hai 3.5stars.

                                                                      

                                                                  **

Prabhu Deva directed Singh Is Bling, hero Raftar Singh ke kisson ki kahani hai.

Jab film Punjab ke chotte gaon mein shuru hoti hai aur Raftar/ Akshay Kumar, kabhi oonto ke saath daudta hai, aur kabhi naachte ghodon ke beech mele mein gana gaata hai, toh hum maan kar chalet hai ki ye masti bhari feel good film hai.

Jab Akshay ke pita uski harkaton se tang aakar, usse apne dost, Kirpal Singh ke paas, naukri ke liye Goa bhejte hai aur Kirpal Singh Akshay ko Amy Jackson ke body guard ki duty dete ha, tab Lara Dutt hume samjhati hai ki ye toh comedy film hai.

Aur Romania mein jab film ka villan, K.K.Menon, aate jaate, yuhin laashe bichata hai aur Goa mein, Amy Jackson apne stunts ke jalwe dikhati hai, tab khulasa hota hai ki asal mein ye feel good/ comedy film nahi stylized action film hai.

Akshay ko Angrezi nahi aati aur Amy ko Hindi nahi aati, iske bawajood, dono Punjab ki hariyali mein romance karte hai tab humari galat faimi door hoti hai ki ye action film nahi unusual love story hai.

Climax mein Akshay, Amy Jackson ke bichde pariwar ko milate hai aur kaafi rona dhona hota hai tab hum phir se confuse ho jaate hai ki ye toh serious family drama film hai.

Sach toh ye hai, ki director Prabhu Deva kisi genre/ sandesh/ kahani ke mohtaaj nahi hai. 

Amy Jackson ke action ko Akshay Kumar ki rang-birangi paghdiyon ko khubsoorat locations mein sajakar, director ka irada saaf hai: Balle Baale naachna!

Singh Is Bling ko Big Entertainment Ratings milte hai 2 stars.

@bhawanasomaaya